കിളിപ്പാട്ട്

1


കഥ പാടാത്തതെന്തെന്ന്

ചോദിച്ചപ്പോഴിണക്കിളി-

ചെവി കേള്‍ക്കുകയില്ലല്ലോ


ചെവി കേള്‍ക്കാത്തതാര്‍ക്കെന്ന്

വെടിയൊച്ച മുഴങ്ങുന്നു

കുട്ടികളുടെ നിലവിളി


"അച്ഛനെന്തു പറഞ്ഞാലും

കാട്ടിലേക്കില്ല യാത്രകള്‍

കിഴവന്റോരോ പഴങ്കഥ"


"കടല്‍ത്തീരത്തു ചെന്നിട്ട്

കിഷ്കിന്ധയ്ക്കു മടങ്ങുക

കണ്ടില്ലെന്നങ്ങു പറയണം"


മണ്ണുണര്‍ന്നു മെനഞ്ഞിവള്‍

കണ്ണിലാ മണ്ണു പോയി പോല്‍

മണ്ണിന്‍ കണ്ണു നനയുന്നു


2


ഫ്രെയിമില്‍ ഒത്തു കിട്ടുവാന്‍

അടുത്തു ചേര്‍ന്നിരിക്കുക-

കാട്ടാളരുടെ ക്യാമറ


വിശക്കുന്നവനു ഭക്ഷണം

കരയുന്നവനു സാന്ത്വനം

മുനിക്കു പറയാമത്


പിണങ്ങാനല്ല പടനിലം

ഇണങ്ങുകയും വേണ്ട

ഒറ്റയ്ക്കൊറ്റയ്ക്ക് പൊരുതുക


ഊമയല്ലല്ലോ കുട്ടികള്‍

ചെകിടും തുളയുമുണ്ടല്ലോ

അവരും പാടിക്കോട്ടെ


3


അച്ഛനെന്തും പറഞ്ഞോട്ടെ

കഥ പാടാത്തതെന്തെന്ന്

ചോദിക്കുകയേ വേണ്ട


മുന കൂര്‍പ്പിച്ച നാരായം

കിളിക്കു മിണ്ടിക്കൂടാ

"ശബ്ദമില്ലാതെ കൊന്നുതാ"

Comments

Unknown said…
kollaam.. pakshe 4 varikal koodi oru Stanza vannaal onnukoodi nannayirunnenne (eenam)..

Ee verification eduthukalanjoode?

Popular posts from this blog

വഴി

മൊബൈല്‍

പനി